زمان سألتك انت مين؟ماجاوبتنيش وجاوبت أنا عنك
كان نفسى تفهم مرة واحدة
ان قلبى وعمرى ملكك
سألت قلبى ازاى يخاصمك؟!
دا بكلمة منك قوام يسامحك
ينسى يعاتبك ,,ويعيش ف جرحك
تبعد وتقسى ,,ولا يوم بينسى
لما ببكى بحس همسك يقول لى
أنا جنبِك وبقلبى سامعك
...لكنى برده بحس بعدك
و يهجرنى قلبك و أدور عليك
عشقت روحك ودخلت قلبى
ورسمت ابتسامتك فوق ملامحى
بخبى عينى لا يبان عليا
ويشوفوا طيفك واخدنى معاه لدنيا تانية
تبان فى شكلى والا فى كلامى أو ملامحى
لكنى بهرب من حكايتك
أعمل ايه؟! ما هو من قساوتك
قلبى بجد مش مسامحك
ضيعت أحلامه بعندك
ضل قلبى فى حلمه بيك طريق لقاك
كان بيحلم بالأمان اللى يلاقيه بين ايديك
وكان بيحلم بالحنان اللى مفتاحه نظرة واحدة من عنيك
وكان بيحلم بحضن قلبك وبدفاه وبقربه منك
كان فى حلمه واصل مداه
كان حلمه يكمل عمرى وعمرك واحنا لبعضنا مقسومين
وكان بيحلم بابنى وابنك ويبقى شبهك حلو وأصيل
وكان معدى بحلمه أبعد أمانى
لما يِهنا الحب لينا ولآخر العمر الجميل
وكان ..وكان..وكان ..
لكن حلمه دا زى أى حلم يشوفه فى المنام
لما يصحى يلاقى نفسه ناسيه قوام!
ولسه بسأل قلبى عنك وإزاى نسيك؟!
لقيته لسه فى حلمه بيك ! ونبضه يهمس:
لسه حلمه مانتهاش فماتسأليش!!
