كنت خايف ..

كنت خايف لما تمشى و تسبينى
قلبى تدوب شمعته فى نار حنينى
و أملى يتكسر شراعه ف موج أنينى
و الربيع من عمرى يتحول خريف
و كل نسمة حب ألقاها وجع و زيف
و الجرح يسكن روحى و الضحكة تروح
و الحزن يبان فى صوتى من غير ما أبوح
و الأيام من ايدى تجرى و ابقى خايف
لو قابلتك مرة صدفة ابقى شايف
كل غرامنا و حبنا و السكون يملا الشفايف
و أحن ليكى و أضعف بعد السنين
اللى عاشها القلب فى غربة و أنين
و الشوق فى قلبى يكسر كل رغبة للرحيل
لكن اللى كان يا قلبى دا أكبر دليل
إن الزمان قواك و نساك الجراح
و طويتها صفحة من حياتك و لقيت براح
لما قابلت قلب تانى يعشقك و يمحى آهاتك
و يفضل جمبك و يعيش معاك باقى حياتك
و كفاية أشوف فى عنيكى نظرة ندم
على قلبى اللى ياما ضحى و اتظلم
ضيعتى حبه ليكى ف لحظة زمان
و نسيتى انه كان لك م الدنيا حضن و أمان
و افتكرتى بعدك خلاص مالوش حياة
لكن الاخلاص لقلبى كان طوق النجاة