مخــاصمـاك

فاكراك ياللى انت مش ناسينى
وبعادك ده والله على عينى
صورتك ادامى مالية عينى
وطيفك من نومى يصحينى

...

ادامى وعيونى مش شايفااك
معايا , حواليا ومش لاقياك
مشتاقة وايدى مش طايلاك
ياللى انت فى عيونى ملاك

واجى اشاورلك تمنعنى ايديا
وتقول لا لا لسة شوية
لا تسلم ولا ترد تحية
واسألها ليه تقول لى مخاصماه

واقول لعيونى تندهلك
ولشوقى يا قلبى توصفلك
تقول مش عايزة تفتكرك
سايب دموعها السهرانة
طول الليالى وحيرانة
ولا تسأل عنها ولا حاجة
وهى كمان برده مخاصماك

واروح لشفايفى تنصفنى
تسأل عليك وتطمنى
تقول مش عايزة تجيب سيرتك
ولا عايزة كمان تشغل فكرك
سيبينى لسكاتى انا من فضلك

طب أعمل ايه أنا دلوقتى ؟!
وطلعت بحبه وبشتاق له !
ده جارحنى وانا كمان جارحاه
وانا عايشة فى حبه وبهواه
لا عاتبنا ولا احنا عاتبناه
ولا قابلنا ولا يوم نسيناه

ياللى انت مش دارى بحالى
تعالى جاوبنى على سؤالى
انت مين رد وقول لى
وايه عملته وليه بيحصل لى
و قول لى فاكرنى وانا مش نسياك
و كُلِّى ليه رافض لُقياك؟!!