حلم رافض للتخلى
و كنت دايب فيكِى تمنى
وقلت مع الأيام هتبقى
انتِى شمسى وانتِى ظلى
وانتِى الحب فى قلبى يسرى
كان يقوينى وجودك
والحياة تحلى بصوتك
و الأمل نظرة عيونك
و الأمان شايلاه كفوفك
و الربيع طارح خدودك
والسما تصفى بلونك
والقمر يحسد كسوفك
عمرى متقسم فصولك
كنتى سابقانى فى حزنى
زى ما تشاركينى فرحى
وكنت تدعى وقلبى يهدأ
لما أقلق و أحزن فَـأرضى
جدا آسف حبيبتى ليكى
كنت قاسى كتير عليكى
وكنت أشوف قلقك وحيرتك
و أفضل أتفرج عليكى
كنت بطمّن لخوفك
لما تقولى تاعبنى أضحك
وأقول ازاى ؟طب فهمينى
يسكت عتابك ويزيد عذابى
و دموعك جوه فى قلبى تجرى
ضحكى مش إهانة ليكى
بجد دا فرحة قلبى بيكى
لانى عرفت الحب فيكى
وداريته ياما كتير عليكى
ومهما أدارى يبان عليا
لو حد بص فى عينى ثانية
يلاقى صورتك جواها ساكنة
وفِكْرِة بالى معاكى سارحة
راسمِك جُوّة فى قلبى مَلِكَة
وحرفك تدوقه شفايفى بسمة
وخوفى وقلقى يبان فى لهفة
لما تغيبى والقاكى راجعة
نفسى اعترف قدام عنيكى
انك حبيبتى و روحى فيكى
لو تقبلى قلبى فى ايديكى
وعمرى كله أعيشُه ليكى
بلاش تعاتبينى فى جرحك
لانه جارحنى وقاسى زعلك
ماكانش ينفع إنى أقولك
ع اللى جوايا وأصارحك
بِعدت عنك آه لَكِنِّك
معاكى روحى وقلبى عاشقك
كان معذبنى سكوتى
وضعفى كان يخنق فى صوتى
و آجى أوعدك يسكت كلامى
لانى خايف اخلفه واطلع جبان
وانا مش هستحمل انى اصدمك فِىَّ كمان
وتشوفينى ورقة خريف مع أول ريح أسقط
و أبان هش وضعيف
وأنا مش جبان و مانيش ضعيف
لو تعرفى قد ايه حبى اللى ليكى
لو ينفع أمسح كل دمعة
نزلت بسببى من عنيكى
لو أقدر ألف الكون معاكى و أطمنك
وامحى الخوف اللى ماليكى
لو تسمحيلى أخطفك و أعدى بيكى
من كل حزن و كل جرح
زمان صابك واستنى فيكى
حلم السنين جايلك معاه كل الحنين
مادد ايديه ضميها لقلبك واكسبيه
مش عارف أقولك تانى ايه
غير انك لو تعيشى معايا
وتقبلينى فى حبك أسير
مليش غير إنك تفرحى
يا ضى العين وانتى الدليل
=<3)
ليست هناك تعليقات:
إرسال تعليق