و أتارى ده كله بيجرالى
وأنا مساهم
والهم فـ قلبى ليل طاغى
و أنا مسالم
و النور فــ عينى نهار طافى
و أنا مسافر

و راسم على وشى الضحكة
و أنا بنازع
والنَّفْس شعورها متضايق
و لا فارق
و فـ عز النوم أقوم أصرخ و أتخانق
ويجى الصبح يزور خدى صباح رايق
أقوم أصحى و أتعايق
و أوزع شمسه فـ ليل قلبى اللى بيفارق
ويبعت لى الأمل مرسال
ويرسم ع الخدود رمان
تبوس خطوتى الأيام
اتمخطر و أنا فرحان
مانا القاضى وانا المحبوس
وانا العاشق وانا المجروح
وانا اللى رافض لقلبى البوح
فى كل شىء انا ضده و انا هو
كتير بسكت وبتالم
واقول هتعدى واسلم
وقليل لما بتكلم
و بنسى ان الكلام مفتوح
و اقول عادى و يوم هادى
و كده اهى الليالى تفوت
لا كان لى مركب و لا مجداف
و فـ ماتش الكورة مش هداف
و فـ السباق أنا خاسر
لانى فــ وحدتى حاير
وحابس نفسى فـ دواير
وشايف عتمتى ألوان
يا ليل يا حزن انا مسافر
و سايبكم فـ القلب دفاتر
و عليه الزعل مرفوع
مكانكم فى فلبى مش ممنوع
بس لابد نتصالح
ويدخل فرح يقابلكم
بقاله كتير غايب عنكم
و القلب فاتح له ابوابه
لكن مكسوف على بابه
لو يدخل ازاى يلاقيكم
أنا حاير ..!